Horrela babesten ditugu zure datuak Elian
Eliarekin itzultzean, normala da galdetzea zer gertatzen den gurekin partekatzen dituzun testu, dokumentu eta datuekin. Gordetzen al dira? Ereduak entrenatzeko erabiltzen dira? Nork eskura ditzake?
Elian, segurtasuna eta pribatutasuna diseinuaren parte dira. Neurri teknikoak eta antolakuntzakoak ditugu, dokumentazio profesionala, korporatiboa eta informazio sentikorra kudeatzeko.
Itzultzen duzuna zeurea da
Zure testuak eta dokumentuak ez dira erabiltzen gure ereduak entrenatzeko. Eliarekin itzultzen duzun edukia ez da berrerabiltzen gure itzulpen-ereduak entrenatzeko edo hobetzeko, ezta zerbitzua ematearekin zerikusirik ez duten beste helburu batzuetarako ere.
Horrek esan nahi du Elia erabil dezakezula dokumentazio profesionala edo eduki sentikorra itzultzeko, jakinik zure testuak ez direla gure sistemen entrenamendu-datuen parte izango.
Zure fitxategiek ezabatze-data dute
Eliara igotzen dituzun fitxategiak automatikoki ezabatzen dira sei hilabeteren buruan. Ez duzu ezer egin behar: behin epe hori igarota, ezabatu egiten dira.
Are gehiago, eskuz ezaba ditzakezu nahi duzunean. Dokumentu batekin lan egiten amaitu baduzu eta jada behar ez baduzu, une horretan bertan ezaba dezakezu.
Gauza bera gertatzen da zure erabiltzaile-datuekin: zure profiletik alda ditzakezu, baita zure kontua ezabatu ere, nahi duzunean.
Zure itzulpenak Europan prozesatzen dira
Elian erabiltzen dituzun testu eta dokumentuak Europako Esparru Ekonomikoaren barruan dauden azpiegituretan ostatatzen eta prozesatzen dira.
Hala, itzulpen-zerbitzuari lotutako informazioaren tratamendua datuak babesteko Europako esparruaren barruan egiten da.
Segurtasuna eta pribatutasuna diseinutik bertatik
Datuen babesa ez da gehigarri bat. Segurtasuna eta pribatutasuna kontuan hartzen dira gure zerbitzuen diseinuan eta garapenean.
Gainera, Elhuyarrek ISO/IEC 27001:2022 ziurtagiria du, informazioaren segurtasuna kudeatzeko erreferentziazko nazioarteko estandarra. Ziurtagiri horrek babesten du informazioa babesteko, arriskuak kudeatzeko eta segurtasun-neurriak etengabe hobetzeko dugun konpromisoa.
Datu pertsonalen tratamendua Datuak Babesteko Erregelamendu Orokorraren (DBEO) eta Datu Pertsonalak Babesteko eta Eskubide Digitalak Bermatzeko 3/2018 Lege Organikoaren arabera egiten da.
Kontrola zeurea da
Datuen babesak esan nahi du, halaber, zeure informazioari buruz erabaki dezakezula.
Datuak atzitzeko, zuzentzeko, ezerezteko, mugatzeko, aurka egiteko eta eramateko eskubideak erabil ditzakezu, hala dagokionean, baita adostasuna kendu ere, helbide honetara idatzita: datuensegurtasuna@elhuyar.eus.
Gure pribatutasun-politika ere kontsulta dezakezu datuen tratamenduari buruzko xehetasun guztiak izateko.
Izan ere, adimen artifizialeko tresna bat erabiltzeak ez luke esan nahi zure informazioaren gaineko kontrola galtzea. Elhuyarren zure datuekin zer gertatzen den jakin dezazun nahi dugu, eta datu horiei buruz erabaki dezazun.
